Sapo kanë përfunduar homazhet në “Pallatin e Kongreseve” në nder të nënkomisarit Saimir Hoxha që u vra në krye të detyrës. Në ceremoninë e lamtumirës së fundit ishin të pranishëm të afërm, kolegë, zyrtarë të lartë, përfshirë dhe politikanë.
Presidenti Ilir Meta ka qenë i pari zyrtar i lartë që ka marrë pjesë në homazhet për nënkomisarin Saimir Hoxha. Para gazetarëve, Meta u shpreh se ky është një moment i dhimbshëm për familje e të ndjerit, ndërsa shtoi se lufta nda trafikut të drogës është prioritet çdo kohë.
“Është një moment i dhimbshëm që ti japim lamtumirën e fundit një nënkomisari të shkëlqyer, që nuk e meritonte të ndahej nga familja. Sigurisht që është një moment reflektimi, për luftën kundër krimit të organizuar, është një prioritet lufta çdo sekondë kundër trafikut të drogës, atyre që përfitojnë prej saj, dhe për të shpëtuar sa më shumë të rinj dhe fëmijë që për fat të keq bien pre e këtij fenomeni shkatërrimtar. Kjo është një luftë që duhet bërë çdo sekondë, dhe nuk duhet të kujtohemi vetëm në momente të tilla tragjike”, tha Meta.
Pas më shumë se 24 orësh nga ngjarja e rëndë, kryeministri Rama ka reaguar për herë të parë. Pasi mori pjesë në homazhet për të ndjerin, Rama u mjaftua duke thënë se kjo është një ngjarje e rëndë për forcat e policisë, ndërsa shtoi se fëmijët e të ndjerit do të marrin 170% të pagës së tij deri kur të arrijnë moshën e pjekurisë.
“Padyshim që është një çast i rëndë për të gjitha forcat tona të Policisë së Shtetit. Patjetër edhe për shoqërinë, i shpreha ngushëllimet vëllazërore familjes dhe të gjithë kolegëve që e kanë njohur nga afër këtë dëshmor të ri të atdheut dhe të gjithë punonjësve të policisë. E shoh të udhës të bëj me dije se qeveria ka vendosur mbështetje financiare të konsiderueshme për të familjen. Fëmijët e të ndjerit do të marrin 170% të pagës së tij deri kur të arrijnë moshën e pjekurisë. Nuk ka fonde dhe mbështetje materiale që kompenson boshllëkun për familjen, por detyra e shtetit dhe përgjegjësia e republikës është që fëmijët e dëshmorëve që japin jetën në krye të detyrës mos të mbeten vetëm por të ndjehen deri në fund të mbështetur, duke qenë krenare jo vetëm për prindin por edhe për shtetin që babai i shërbeu deri në momentin e fundit”, tha Rama.
Edhe lideri i opozitës Lulzim Basha ka marrë pjesë në homazhet e Hoxhës, ku në një prononcim për mediet, tha se nuk është momenti për të ngritur gishtin e përgjegjësisë, por duke kujtuar kohën kur ka qenë ministër i Brendshëm, u shpreh se e ndjen dhimbjen e tyre çdo ditë.
“Jam këtu për t’i dhënë lamtumirën e fundit nënkomisarit Saimir Hoxha, bashkë me lutjet që shpirti i tij të prehet në paqe, me lutjen që Zoti të lehtësojë dhimbjet e familjarëve të tij. Shpreh solidaritetin për motrat dhe vëllezërit me uniformë të Saimir Hoxhës, që përballen çdo ditë me krimin për të siguruar jetën e çdo qytetari. Sot nuk është dita për të ngritur gishtin e përgjegjësisë, por si drejtues i tyre i dikurshëm, them se dhimbjen e tyre të përditshme e ndjej përditë. PD do të bëjë gjithçka për të rivendosur dinjitetin e motrave dhe vëllezërve me uniformë të Saimir Hoxhës”, tha Basha.
Efektivi Saimir Hoxha u vra ditën e djeshme në krye të detyrës nga 21-vjeçarit Aldi Rama. Nënkomisari i Lezhës ishte babai i dy djemve 1 dhe 3 vjeç teksa ishte rritur nga dy prindër mësues. A i vra ditën e djeshme në momentin që ka shkuar për të asgjësuar bimë narkotike në një zonë ku kishin marrë informacion. Gjatë operacionit ato janë ndeshur me një makinë ku ndodheshin tre të rinj, mes tyre edhe Aldi Rama i cili ka qëlluar për vdekje drejt Saimir Hoxhës.
