Ambasadorja amerikane Yuri Kim vazhdon e vendosur punën e saj për rritjen e reformës në drejtësi në vend. Në kohët e fundit kanë qenë të shpeshta takimet e saj me drejtues të institucioneve të drejtësisë, për t’iu kujtuar se lufta kundër korrupsionit do të vazhdojë, ndërsa ditën e sotme ajo është takuar me ministrin Ulsi Manja.
Lajmin e ka bërë të ditur vetë Manja përmes një postimi në Facebook, ku shkruan se fokusi i bisedave ka qenë për rritjen e bashkëpunimit mes SHBA dhe Shqipërisë për të luftuar krimin e organizuar në vendin tonë.
“Mbështetja e Shteteve të Bashkuara të Amerikës është e paçmueshme për Shqipërinë. Me Ambasadoren Kim biseduam dhe ndamë së bashku idetë dhe objektivat për të vijuar më tej punën pa kthim, për zbatimin e plotë të Reformës në Drejtësi në të gjithë përbërësit saj.
Pengesat e vogla nga çdo anë të vijnë, as nuk do të pengojnë e as nuk do të ndalojnë bashkëpunimin tonë maksimal në luftën ndaj korrupsionit, krimit dhe pandëshkueshmërisë në Shqipëri”, shkruan ai.
Kujtojmë se gjatë këtij muaji Kim ka bërë takime të shpeshta edhe kreun e SPAK si dhe persona të tjerë të sistemit të drejtësisë, ku në çdo takim ka kërkuar më shumë integritet dhe ashpërsim të luftës kundër korrupsionit.
