Në 13 vitet e fundit më shumë se 234 mijë shqiptarë kanë kërkuar azil në një nga vendet e Bashkimit Europian. Kështu konstaton Eurostat përmes një raporti të publikuar së fundmi. Në këtë raport renditen edhe disa vende të tjera ku numri i azilkërkuesve është shumë i lartë, por Shqipëria ngelet vendi rekord i emigrimit politik dhe ekonomik në Europë dhe në botë.
Sipas të dhënave, Gjermania është vendi ku shqiptarët depozitojnë më shumë kërkesa për azil, ku në total numërohen rreth 95 mijë azil kërkues. Ndërsa sqarohet se, në dy vitet e fundit janë shtuar ndjeshëm dhe pjesa më e madhe janë të rinj, për shkak se fillimisht ikin atje me vizë pune 1 po 2-vjeçare dhe më pas kërkojnë të qëndrojnë atje, duke kërkuar azil ekonomik. Shteti i dytë më i preferuar është Franca, me rreth 63 mijë kërkesa gjithsej për azil, ose 26% e totalit dhe fill pas Francës renditet Mbretëria e Bashkuar, me 21 mijë kërkesa gjithsej.
Ndryshe nga disa vite më parë ku Greqia mbante rekord për numrin e emigrantëve shqiptarë, në vitet e fundit kërkesat për azil në këtë vend kanë filluar të reduktohen, por gjithsesi mbetet vendi i katërt me 16.5 mijë kërkesa , e ndjekur nga Suedia, me 4.5% të totalit.
Sipas viteve, numri më i madh i aplikimeve për azil)është shënuar në vitin 2016, me gati 69 mijë, ku gati 80% kishin destinacion Gjermaninë. Ndërsa, nga viti 2017, vëmendja u zhvendos nga Gjermania drejt Francës, që në 2019-n kishte gati gjysmën e kërkesave. Ndërsa në vitin që lamë pas, pandemia i frenoi përkohësisht aplikimet, për shkak të karantinave dhe kufizimeve të udhëtimeve, por nuk i ndali tërësisht.
Por me hapjen e kufijëve pas izolimit pandemik, shqiptarët filluan sërish të kërkonin azil në vend e lartë përmendura pa humbur më shumë kohë. Sipas Eurostat, në korrik 2021 kishte 735 kërkesa për azil nga Shqipëria, niveli më i lartë që nga fillimi i pandemisë, me rritje prej 24% në krahasim me muajin e mëparshëm. Shifra mund të ketë edhe më e lartë, pasi për korrikun nuk kanë raportuar ende të gjitha shtetet.
