Energjia e prodhuar në vend në fund të 8-mujorit të këtij viti arriti mbi 7 milionë MWh nga të cilat 60 për qind u prodhua nga KESH dhe pjesa tjetër nga sektori privat.
Të dhënat zyrtare të raportuara nga kompanitë pranë Entit Rregullator të Energjisë për periudhën e 8-mujorit tregojnë se nga sasia e prodhuar e energjisë së KESH që ishte 4.29 milionë MWh, kompania publike e shpërndarjes përmes Furnizuesit të Shërbimit Universal ka marrë vetëm 52 për qind të sasisë që është konsumuar në vend.
Kjo do të thotë që pjesa tjetër e energjisë së konsumuar që në total arriti 5.68 milionë MWh është siguruar në mënyra të tjera nga ana e Operatorit të Shpërndarjes së Energjisë Elektrike (OSHEE) dhe nën kompanive të saj.
Konkretisht OSHEE përveç 2.96 milionë MWh energji të siguruara nga KESH, plotësimi i konsumit është bërë në disa mënyra. Një pjesë modeste e energjisë është marrë nga fotovoltaikët me 30.5 mijë MWh energji, mbi 738 mijë MWh janë blerë nga HEC-et private konceisonare të lidhura si në rrjetin e transmetimit ashtu edhe në atë të OSHEE. Nga Ashta gjithashtu ka pasur një sasi energjie.
Teksa konsumi në vend ka qenë 5.68 milionë MWh prodhimi neto rezulton më i lartë. Kjo lë të nënkuptohet se një sasi energjie mund të jetë eksportuar. Kjo sasi që del nga diferenca e të dyjave rezulton të jetë 1.3 milionë MWh.
Pavarësisht se muajt e parë të vitit u duken premtues për sasinë e energjisë që do të prodhohej në vend. Ky vit ka qenë sërish një nga më të vështirët për të siguruar energji nga Operatori i Shpërndarjes. Ky i fundit muaj pas muaji ka zhvilluar procedura për të mbuluar konsumin të cilat kanë pasur çmime jashtëzakonisht të larta duke arritur deri në 195 euro/ MWh.
Kjo situatë krejt anormale në çmime ka pasur lidhje me çmimet në bursa të cilat kanë qenë të larta ndërkohë që blerjet kanë qenë të minutës së fundit. Një situatë e tillë me energjisë dhe çmimet po vërehet në shumë vende ku rritja ka qenë jo pak por me 30 për qind, diçka që i dedikohet rikthimit në normalitet të ekonomive dhe kërkesës pas situatës pandemike të rënduar.
Shqipëria po përballet me situata të vështira sa i takon sektorit energjetik për shkak të varësisë së madhe që ka nga sektori hidrik ndërkohë që diversifikimi i shumëpërfololur ende do kohë që të japë frytet e veta në disa projekte që kanë nisur zbatimin në fotovoltaik , eolik apo projekti i gazit i mbështetur nga amerikanët./Monitor
