Kryeministri i Kosovës Albin Kurti ka reaguar pas arritjes së marrëveshjes për reciprocitetin e targave mes Kosovës dhe Serbisë në Bruksel. Kurti thotë se tani nis epoka kur Serbia mësohet me reciprocitet.
“Në javën e shkuar, Presidenti i Serbisë vuri katër kushte për takimin në Bruksel të përfaqësuesve tanë. Natyrisht që nuk ju plotësuan ato dhe dje u zhvilluan bisedimet në Bruksel. Tash fillon epoka kur Serbia nis e mësohet me reciprocitet”, shkruan Kurti.
Marrëveshja e arritur për reciprocitetin e targave do të funksionojë në vijim dhe monitorohet nga autoritet policore të Kosovës, dhe çdo shtetas serb në territorin shqiptar do të pajiset me targa të përkohshme.
“Reciprociteti i targave të automjeteve është vendosur. Meqë targave të Republikës së Kosovës në Serbi do t’iu mbulohet simboli shtetëror, të gjitha targave të Serbisë pa dallim do t’iu mbulohet po ashtu simboli i tyre në territorin e shtetit tonë. Njësia Speciale e Policisë së Kosovës ka shkuar në Jarinje dhe Bërnjak më 20 shtator për të mbrojtur vendkalimet dhe policinë kufitare nga bllokuesit e rrugëve dhe qarkullimit të lirë. Meqë ata do të largohen, njësia jonë speciale nuk ka pse qëndron atje, dhe mbetet gjithnjë e gatshme për ndërhyrje në çfarëdo cenimi të njëjtë apo të ngjashëm në të ardhmen. Natyrisht, policia jonë kufitare në vijim do të zbatojë reciprocitetin e targave. KFOR-i do të qëndrojë aty, rreth dy javë, që gjithçka të jetë e sigurt”, sqaron Kurti.
Pas pothuajse dy javësh konflikti dhe tensioni në kufi, gjithçka ka përfunduar me reciprocitet dhe Serbia është detyruar të heqë dorë nga kushtet që përcaktoi më herët.
