Ka hyrë zyrtarisht në fuqi urdhri i Ministrisë së Shëndetësisë për vaksinimin me detyrim të personelit të institucioneve arsimore dhe studentëve.
Sipas urdhrit të firmosur nga ministrja Ogerta Manastirliu më 24 shtator, dhe të publikuar këtë të mërkurë në Fletoren Zyrtare, personeli i institucioneve arsimore duhet të depozitojë pranë qendrës së punës dhe studentët pranë zyrave të përcaktuara nga IAL-të përkatëse, Certifikatën e Vaksinimit Covid-19 nga e-Albania apo kartën e vaksinimit.
Për studentët apo pedagogët që nuk paraqesin certifikatën apo kartën e vaksinimit do të kërkohet paraqitja, çdo javë e testit PCR, të kryer sipas procedurës për kryerjen e testeve për efekte administrative, për të verifikuar që nuk janë mbartës të infeksionit Sars–Cov-2.
Ndërkohë, studentët duhet të paraqesin certifikatën e vaksinimit Covid-19 apo kartën e vaksinimit, për të hyrë në institucionet e arsimit të lartë, duke filluar nga data 11.10.2021.
Instituti i Shëndetit Publik ngarkohet të marrë masat dhe të monitorojë mbulimin vaksinal të grupet e përmendura si dhe të raportojë në Ministrinë e Shëndetësisë dhe Mbrojtjes Sociale. Po ashtu, ngarkohet Operatori i Shërbimeve të Kujdesit Shëndetësor, Inspektorati Shtetëror Shëndetësor, Instituti i Shëndetit Publik të bashkëpunojnë me institucionet e arsimit të lartë, për zbatimin e këtij urdhri.
