Apeli i GJKKO ka pushuar çështjen për sekuestrimin e kompleksit “Golden Resort” në pronësi të Altin Hajrit në SHijak. Ndonëse gjykata e Apelit kishte vendosur që të mos bëhej konfiskimi i pronave të Altin Hajrit, ishte SPAK (Prokuroria e Posaçme Anti-Korrupsion) që ankimoi këtë vendim duke kërkuar që të bëhej sekuestrimi.
Ndërsa ditën e sotme mësohet se SPAK është tërhequr nga kjo kërkesë dhe në këtë mënyrë Kolegji i Gjykatës së Posaçme të Apelit për Korrupsionin dhe Krimin e Organizuar, vendosi që të bënte pushimin e kësaj çështje.
Kompleksi luksoz “Golden Resort” është në pronësi të Altin Hajrit. Emri i tij doli në skenë vitin e kaluar pas rrëmbimit të Jan Prengës, pasi i vëllai kishte bllokuar në Angli një ngarkesë të konsiderueshme kokaine nisur nga Ekuadori ku të përfshirë ishin dhe shqiptarë.
Urdhëruesi i pengmarrjes dyshohej të ishte Dritan Rexhepi, teksa më 17 janar u rrëmbye Jan Prenga në Kamzë për ti bërë presion të vëllait Astit Prenga. Rrëmbyesit e dhunuan për vdekje Prengën teksa pikërisht në kompleksin “Golden” të Altin Hajrit nga kamerat e sigurisë u zbulua se si autorët nxjerrin nga furgoni trupin e pajetë të Prengës. Ai nuk është gjetur ende dhe sot teksa dyshohet se trupi i është varrosur në rrethinat e Shijakut.
Altin Hajri është në kërkim si një nga organizatorët dhe u përcaktua dhe si subjekt i OFL. Më 27 shkurt atij iu sekuestrua kompleksi “Golden Resort” bashkë me nj karburant dhe vilë 2-katëshe në Pezë. Tashmë ai e ka rifituar kompleksin e tij pasi për të nuk ka më çështje në Gjykatë, edhe pse vetë vijon të jetë në kërkim për pengmarrjen e vrasjen e Jan Prengës.
Altin Hajri i shpallur në kërkim për pengmarrjen e Jan Prengës, në tetor të vitit 2015 ishte i shpallur në kërkim ndërkombëtar nga autoritetet italiane, i dyshuar si koka e një rrjeti të trafikut të drogës nga Afganistani në Itali. Mirëpo 8 muaj më vonë, në 2016-ën, autoritetet italiane pushuan hetimin ndaj tij, duke hequr emrin e tij nga listat e të kërkuarve.
Në 6 Maj 2019, Altin Hajri rezulton se është dënuar në mungesë me 7 vite burgim për tentativë vrasje dhe armëmbajtje pa leje. Vendimi u apelua nga mbrojtja dhe Apeli i Durrësit e shpalli të pafajshëm Hajrin për dy akuzat që u shpall fajtor në shkallë të parë, tentativë vrasje dhe armëmbajtje pa leje.
