Naftëtarët e Ballshit tetorin e kanë dhe muajin e fundit ku do të marrin pagesën e tyre, si rezultat i marrëveshjes së bërë me kryeministrin Edi Rama një vit më parë.
Punonjësit mblidhen pranë mjediseve të uzinës në Ballsh, pasi ende nuk kanë një përgjigje çfarë do të bëhet me ta.
Naftëtarët shprehen se përditë mbërrijnë kamiona të cilët duan të marrin atë çka ndodhet në uzinë.
“Jemi mbledhur këtu prej disa muajsh. Ne presim sot vendimin e kryeministrit dhe premtimin që ka bërë ai, si në fushatë elektorale dhe në diskutimet që bëri parmbrëmë. Ne nuk të hiqemi nga qëndresa jonë, për të përfituar ato që na takojnë. Këtu po na vijnë rrotull disa njerëz tinëzarë të cilët në mënyrë të fshehur vijnë të na marrin produktet. Pushtetarët penetrojnë mbi djersën tonë.”- shprehet njëri punonjës.
Edhe kreu i Sindikatës, Sokol Dautaj i ka bërë thirrje Ramës dhe qeverisë që të ulen në tryezë për një zgjidhje.
Këtë muaj afati skadon dhe naftëtarët muajin tjetër në rast se nuk gjendet zgjidhje do të mbeten pa pagesë sërish.
Ai thekson se edhe pakti i vitit të kaluar nuk ishte zgjidhje nga ana financiare pasi 550 naftëtarë nuk dalin në pension.
“Kemi pasur një marrëveshje, për 1 vite jemi paguar ndërsa tetori është muaji i fundit. Rama është shprehur se nuk do i flakë naftëtarët, shpresojmë të marrë vendimin e duhur. I kemi qëndruar paktit, vendimi jepet në fund të muajit, muajin tjetër nuk marrim pagë.
Vendimi është i gjithë naftëtarëve, për çdo vit vijmë, ja kemi shprehur kabinetit që pakti nuk është zgjidhja jonë. 550 punonjës nuk dalin pension. Nuk është zgjidhje kjo, nga ana financiare. Falënderojmë Ramën, por nuk është zgjidhje kjo.
E kemi lidhur jetën tonë me naftën, rafinerinë. I kemi qëndruar paktit, tani palët të ulen në tavolinë për të gjetur zgjidhje.“- tha Sokol Dautaj.
Kujtojmë që naftëtarët kanë qenë në grevë urie vitin e kaluar sa i përket faktit që nuk kishin marrë pagat, ndërsa kryeministri u ofroi një marrëveshje e cila përfundon në tetor.
Rreth një vit ka kaluar nga dita kur kryeministri Edi Rama njoftoi marrëveshjen 1-vjeçare me naftëtarët e Ballshit.
Naftëtarët kanë marrë prej një viti pagesën ndërsa duke filluar që prej tetorit pages do të ndërpritet dhe naftëtarët do mbeten të hedhur në rrugë sepse janë ende në gjyqe për cështje që ende nuk kanë marrë zgjidhje. Ka kaluar shumë kohë dhe nuk kanë marrë asnjë përgjigjie nga institucionet e caktuara.
