Sekretari i Përgjithshëm i Partisë Socialiste, Damian Gjiknuri ka qenë ditën e sotme në qytetin e Korçës ku ka zyrtarizuar Niko Peleshin si drejtuesin politik të qarkut për mandatin e tretë.
Gjiknuri tha se kishte nisur një proces organizimi që do të fillonte me dixhitalizimin e anëtarësisë së partisë, duke shtuar se kjo do të bënte të mundur një strukturë që mund të funksionojë kurdo të jenë zgjedhjet e ardhshme.
“Sot patëm rastin të mblidhemi në Korçë bashkë me drejtuesin politik të qarkut, Niko Peleshi që i uroj suksese në rrugëtimin e ri pas konfirmimit në mandatin e tretë. U mblodhën të gjitha strukturat e partisë të gjithë qarkut me qëllim fillimin e një procesi të rëndësishëm që është riorganizimi i PS për sfidat e mandatit të tretë. Kjo përkon me fillimin e mandatit të tretë qeverisës, një mandat i paprecedent më parë pasi asnjë parti në Shqipëri nuk ka pasur tre mandate. Pikërisht qeverisja në mandatin tretë kërkon sfida të reja nga ana e PS. Ne kemi filluar një proces mirëorganizimi që fillon që me dixhitalizimin e anëtarësisë dhe së dyti me riorganizimin e të gjithë strukturave dhe përfshirjen e tyre maksimale që në momentet e para jo duke pritur fushatën zgjedhore. Kjo do të thotë që PS të jetë në gjendje të ndërtojë një strukturë të mirëfilltë elektorale në çdo kohë kur të jenë zgjedhjet qofshin vendore apo të përgjithshme”, tha Gjiknuri.
Sipas tij, këto ndryshime bëhen me qëllimin që partia të jetë në kërkesat që kërkon mandati i tretë dhe të jetë një forcë e aftë politikisht për të fituar gjithmonë.
