Britania e Madhe mobilizoi trupat ushtarake për të furnizuar pikat e karburanteve në të gjithë vendin, ndërkohë që kriza e mungesës së naftës, benzinës dhe gazit vazhdon.
Të paktën 200 trupa, përfshirë 100 shoferë, kanë marrë trajnime dhe do të fillojnë dërgesat për të ndihmuar në lehtësimin e situatës në pikat e karburanteve.
Qeveria njoftoi gjithashtu se një skemë e përkohshme e vizave për afro 5 000 shoferë të huaj të transportit të ushqimeve, që do të skadonte më 24 dhjetor, do të zgjatet deri në fund të shkurtit.
Partitë opozitare kanë bërë thirrje për një seancë të jashtëzakonshme parlamentare për zgjidhjen e situatës, përfshirë ndërprerjen e zinxhirit të furnizimit.
Udhëheqësi i opozitës, Keir Starmer tha se skema e përkohshme e vizave nuk do të funksiononte dhe i kujtoi kryeministrit Johnson nëse është e nevojshme që të nxitojë përmes legjislacionit për të siguruar që raftet e supermarketeve të mos mbeten bosh në prag të Krishtlindjeve.
Lideri i Partisë Nacionaliste Skoceze, Ian Blackford tha se Boris Johnson “duhet të tërheqë menjëherë parlamentin dhe të zhvillojë bisedime ndërpartiake për të përcaktuar hapat për të trajtuar efektivisht krizën e Brexit”.
“Mungesat e mëdha të fuqisë punëtore, kostot e larta, raftet e zbrazëta të supermarketeve, kriza e vazhdueshme e karburantit dhe barrierat tregtare po shkaktojnë të gjitha dëm serioz dhe të qëndrueshëm”, deklaroi ai.
Në një njoftim dje, qeveria tha se 300 shoferë transporti karburantesh do të ishin në gjendje të vinin në Britaninë e Madhe nga jashtë.
Rreth 4 700 viza të tjera të destinuara për drejtuesit e jashtëm të transportit të ushqimeve do të zgjaten përtej tre muajve të shpallur fillimisht dhe do të zgjasin nga fundi i tetorit deri në fund të shkurtit.
Një total prej 5 500 punonjësish që merren me mbarështimin e shpendëve gjithashtu do të lejohen të ndihmojnë në mbajtjen e rafteve plot të supermarketeve para Krishtlindjeve.
Qeveria ka thënë se këta punëtorë, të cilët mund të mbërrijnë nga fundi i tetorit, tani do të jenë në gjendje të qëndrojnë deri më 31 dhjetor sipas skemës së përkohshme të vizave.
Por, qeveria shtoi se vizat nuk do të jenë një zgjidhje afatgjatë dhe dëshiron që punëdhënësit të bëjnë investime në fuqinë punëtore britanike në vend që të mbështeten në punën jashtë shtetit.
Ajo shtoi se po punon gjithashtu me industrinë për të gjetur zgjidhje afatgjata për mungesën e drejtuesve dhe për të inkurajuar më shumë njerëz të hyjnë në sektorin e logjistikës duke përmirësuar pagën dhe kushtet.
Shoqata e Shitësve me Pakicë të Karburanteve (PRA) paralajmëroi se radhët do të vazhdonin nëse furnizimet me karburant nuk rriteshin.
