Qeveria britanike u ka kërkuar mijëra gjermanëve që banojnë në Mbretërinë e Bashkuar të ngasin kamionë për të ndihmuar me mungesën e automjeteve të Mallrave të Rënda, edhe nëse ata kurrë nuk kanë drejtuar një të tillë më parë.
Një letër u dërgua nga Departamenti i Transportit, e nënshkruar nga ministrja Baronesha Vere, duke u kërkuar gjermanëve që jetojnë në Britani të “konsiderojnë kthimin” në sektorin e drejtimit të automjeteve të tilla.
Në këtë letër thuhet se pavarësisht se nuk kanë përvojë në këtë drejtim, ndihma e tyre do tu vinte shumë në ndihmë. Letra iu dërgua gati një milionë njerëzve në Mbretërinë e Bashkuar që mbajnë një patentë shoferi HGV, përfshirë zjarrfikësit dhe mjekët, si pjesë e përpjekjeve për të lehtësuar ndikimin që ka mungesa e shoferëve në zinxhirët e furnizimit me karburant në Mbretërinë e Bashkuar.
“Aftësitë dhe përvoja juaj e vlefshme nuk kanë qenë kurrë më të nevojshme se sa tani. Ekzistojnë mundësi fantastike të drejtimit të HGV në industrinë e logjistikës dhe kushtet e punësimit janë përmirësuar në të gjithë sektorin. Përveç normave tërheqëse të pagave, ne po shohim më shumë mundësi për punë fleksibël, orë fikse, me kohë të plotë apo me kohë të pjesshme.”
Lejet e drejtimit gjermane të lëshuara para vitit 1999 përfshijnë të drejtën për të drejtuar një kamion të vogël dhe të mesëm deri në 7.5 ton. Pothuajse të gjithë gjermanëve që banojnë në Britani që mbajnë një licencë të tillë u është dërguar letra, ku pothuajse asnjëri prej tyre nuk ka drejtuar ndonjëherë një mjet të tillë më parë.
Letra është pjesë e të njëjtit dërgim masiv që u ka kërkuar gjithashtu shoferëve të ambulancave dhe mjekëve të drejtojnë automjetet e mallrave të rënda.
