Me rastin e Ditës së Bashkimit të Gjermanisë, presidenti Ilir Meta ka uruar homologun e tij gjerman Frank-Walter Steinmeierkam.
Meta shkruan në Facebook se Shqipëria i është mirënjohëse Gjermanisë për mbështetjen e sinqertë si për vazhdimësinë gjeo-strategjike të procesit të zgjerimit të BE.
“Vendi im mbetet thellësisht mirënjohës për mbështetjen e sinqertë dhe avokatinë e drejtpërdrejtë të Gjermanisë, si për vazhdimësinë gjeo-strategjike të procesit të zgjerimit të Bashkimit Europian drejt vendeve të Ballkanit Perëndimor, ashtu edhe për kapërcimin e vështirësive në procesin e hapjes së negociatave të anëtarësimit të Shqipërisë në Bashkimin Europian”.
Meta ka falënderime dhe për “Procesin e Berlinit”, që sipas tij hapi një perspektivë të qartë politike dhe ekonomike për të gjitha vendet e rajonit.
“Dëshiroj t’ju falënderoj, Zoti President, edhe për mbështetjen që vendi Juaj, përmes Procesit të rëndësishëm të Berlinit, hapi një perspektivë të qartë politike dhe ekonomike integruese në Bashkimin Europian për të gjitha vendet e rajonit tonë dhe t’ju siguroj se ky proces jetik për të gjithë ne, mbetet rruga më e qartë e më e sigurt për integrimin e plotë të Ballkanit Perëndimor në familjen dhe vlerat europiane”, shkruan Meta.
Ndër të tjera, presidenti shkruan se do të vazhdojë bashkëpunimin mes vendeve, si anëtarë të NATO-s, për çështjet e sigurisë rajonale, në dobi një rajoni të paqtë dhe të begatë.
