Kryeministri Edi Rama do të niset ditën e nesërme drejt Spanjës për të nënshkruar një marrëveshje bashkëpunimi me universitetet spanjolle me qëllim rritjen e cilësisë në arsimin e lartë.
Mësohet se kryeministri Edi Rama do të jetë i shoqëruar nga ministrja e Arsimit, Evis Kushi, për miratimin e memorandumit të bashkëpunimit mes dy vendeve.
Në Spanjë, kreu i qeverisë pritet të diskutojë edhe për qëndrimin që do të mbahet në raport me Maqedoninë e Veriut, në lidhje me procesin e integrimit në Bashkimin Europian. Pas Spanjës, kryeministri Rama niset direkt për në Slloveni, ku më 6 tetor organizohet samiti BE-Ballkani Perëndimor, për të ardhmen Europiane të Ballkanit.
Bashkëpunimi me universitete prestigjioze jashtë vendit është artikuluar më parë edhe nga ministrja Kushi, e cila është shprehur se bashkëpunimet nuk do të jenë vetëm në kuadrin e programeve të studimeve të përbashkëta, por do të shtrihet në të gjitha aspektet e jetës universitare dhe akademike.
