Mbi 500 kuti votimi të 25 prillit do të rinumërohen nga Komisioni Qendror i Zgjedhjeve. Lajmin e ka bërë të ditur kreu i KQZ, Ilirjan Celibashi, i cili tha se përzgjedhja e kutive do të jetë rastësore dhe do të shtrihet në çdo KZAZ.
“Ia kemi dërguar aktin partive politike parlamentare për një opinion nga ana e tyre në lidhje me këtë akt. Mesi i tetorit do të na gjejë me procesin e filluar. Do të jetë një short në mënyrë elektronike praktikisht për të gjithë territorin e Republikës së Shqipërisë, proporcionalisht 10 për qind e qendrave të votimit do t’i nënshtrohen procesit të verifikimit pas zgjedhor“, tha ai.
Ndër të tjera ai sqaroi që, nëse evidentohen shkelje, komisionerët dhe numëruesit do të kallëzohen në prokurori. Ndërsa deri më tani ai tha se, KQZ nuk ka çuar asnjë rast në Prokurori sepse vetë subjektet i kanë dorëzuar çështjeje pranë organeve të drejtësisë.
“5 muaj pas zgjedhjeve, KQZ nuk ka dërguar ende asnjë rast në prokurori, edhe pse subjektet denoncuan raste flagrante, p.sh. si një numërues që bënte shënime mbi fletët e votimit, duke i nxjerrë të pavlefshme. Kjo për faktin që ato parregullsi që janë evidentuar, vetë subjektet zgjedhore që kanë qenë të interesuara i kanë prezantuar pranë organit të prokurorisë”, tha ai për abc news.
Kujtojmë se hapja e kutive ka qenë një kërkesë e vazhdueshme nga opozita të cilët e konsiderojnë 25 prillin si masakër zgjedhore.
