Deputeti i PD, Edi Paloka ka reaguar lidhur me prezantimin e 7 pikave të kreut të Partisë Demokratike, Lulzim Basha, pas shpalljes së krizës energjetike nga kryeministri Rama ditën e djeshme.
Paloka ka theksuar se kjo situatë nuk zgjidhet as me 7-të dhe as me 8-të pika, por duke përmbysur siç e quan ai “regjimin hajduto-dallkaukesh që ka marrë peng një popull të tërë”.
“Çela nuk është vënë aty për të menaxhuar as energjinë e as paratë që paguajnë shqiptarët që ta kenë energjinë. Çela është aty për të vjedhur paratë e shqiptareve që pastaj me një pjesë të vogël të parave që ju ka vjedhur, t’ju blejë dhe votën në zgjedhje! Me hajdutë-dallkaukë të tillë është mbushur gjithë kupola drejtuese e administratës! E kjo situatë nuk zgjidhet as me shtatë e as me tetë pika, por duke përmbysur këtë regjim hajduto-dallkaukësh që ka marre peng një popull të tërë”, shkruan ai.
Gjithashtu, ai fajësoi kryeministrin Rama, që sipas tij ka vendosur në krye të OSHEE një hajdut që dihej që në fillim që këtu do përfundonim.
Ditën e djeshme me një deklaratë të papritur, kryeministri Rama iu drejtua qytetarëve me një mesazh në lidhje me rritjen e çmimit energjisë elektrike që sipas tij po vjen si pasojë e një krizë të jashtëzakonshme energjetike, ku pritet të ketë rritje të çmimit brenda gjashtë mujorit të parë të vitit të ardhshëm. Rama tha se kjo fatkeqësi e re ka sjellë një rritje të jashtëzakonshme të çmimeve e jo vetëm të karburanteve, gazit, karbonit e naftës, por edhe mallrave të konsumit që po diktohet nga manovrat tregtare dhe faktorët e tjerë gjeopolitikë.
