Një ngjarje tronditëse është regjistruar në Malishevë një ditë më parë, teksa një 10-vjeçar është dërguar i pajetë në spital. Ngjarja dyshohet të ketë ndodhur rreth mesditës, teksa në njoftimin zyrtar të policisë bëhet me dije se në kamion u gjet gjithashtu një pistoletë dhe karikatori. I mituri u gjet nga xhaxhai i tij, por ende nuk dihet se si pistoleta ka përfunduar në duart e tij.
Ditën e sotme janë zbardhur të tjera detaje në lidhje me këtë ngjarje të rëndë, ku sipas policisë u gjet dhe një gëzhojë. Sipas mediave vendase, dyshohet që të jetë shtënë prej të miturit, megjithëse do të jetë autopsia e cila do të ndihmojë më tej në zbardhjen e ngjarjes. Familjarët janë të tronditur e nuk dihet se çfarë kanë deklaruar përpara grupit hetimor.
Ky është njoftimi i bërë nga policia:
“QKMF Malishevë, 03.10.2021 – 12:54. Nga emergjenca e QKMF, është informuar se nga familjarët, është sjellë pa shenja jete viktima mashkull kosovar (fëmijë). Njësitë policore në vendin e ngjarjes kanë gjetur një revole dhe një karikator. Me vendim të prokurorit, trupi i pa jetë i viktimës është dërguar në IML për obduksion”
