Mbi 25 persona janë shoqëruar mëngjesin e kësaj të marte në komisariat ku do të merren në pyetje lidhur me atentatin me dy viktimat Ardian Çollaku dhe Lulzim Bitri mbrëmjen e djeshme në Elbasan.
Pista kryesore ku po hetohet ngjarja, është larje hesapesh dhe përfshirje në banda kriminale. Marrë shkas edhe nga e shkuara dy viktimave dhe lidhja e tyre me dy emra të njohur për drejtësinë, Erjon Alibej i cili dyshohet se është porositësi i dy vrasjeve që ndodhën vitin e kaluar në Elbasan dhe me të shumëkërkuarin Talo Çela i cili ndodhet në kërkim kombëtar dhe ndërkombëtar për disa vepra të rënda penale.
Ngjarja ka ndodhur pranë një pike karburanti ku dy personat kanë qenë në këmbë dhe janë qëlluar me breshëri plumbash nga një automjet në lëvizje. Si pasojë e breshërisë ka humbur jetën në pak sekonda Lulzim Bitri ndërsa Ardian Çollaku ndërroi jetë mëngjesin e sotëm në spitalin e traumës. Jo shumë metra larg vendit të krimit, në zonën e Metalurgjikut, policia gjeti një makinë tip “Volvo” duke u djegur, e cila besohet se i përket autorëve.
Nga hetimet paraprake dyshohet se autorët ishin dy, të maskuar. Ndërsa, ende nuk është saktësuar se kush ka qenë shënjestra e atentatit por dyshimet janë se atentati mund të ketë ardhur si pasojë e larjeve të hesapeve mes bandave.
