Deputeti i PD-së, Ervin Salianji, pas takimeve me demokratët e Korçës ka komentuar sërish deklaratën e kryeministrit Rama për rritjen e çmimit të energjisë elektrike.
Deputeti i Korçës shkruan në Facebook se edhe çmimet e sotme të energjisë janë të papërballueshme për qytetarët, duke thënë se ka prej tyre që për shkak të pamundësisë ekonomike, nuk kanë energji elektrike në shtëpi.
“Energjia elektrike edhe sot e kësaj dite është e papërballueshme për një pjesë të qytetarëve. Shumë qytetarë edhe siç e kemi ekspozuar dhe treguar në familjet e tyre janë pa energji elektrike, iu është prerë për shkak të mos pagesës pavarësisht se kanë një apo dy llampa asnjë pajisje tjetër elektronike në shtëpi, ndërkohë që qeveria edhe programi nëse flasim për momentin, programi i Edi Ramës, ka premtuar që do ta ulte çmimin e energjisë”, tha Salianji.
Për Salianjin, zgjidhje është plani me 7 pika i PD, për të bërë të mundur të paktën përballimin e jetesës në kushte minimale.
“Gjithçka për qytetarët po shkon për keq, por për qeverinë po shkojnë gjërat për dreq dhe ne do të bëjmë gjithçka me qytetarët për të nxitur dhe për të qenë pranë tyre me çdo formë rezistence sic kemi qenë për të bërë të mundur që të punojmë për ta dhe të përfaqësojmë denjësisht qytetarët. Plani prej 7 pikash nga Partia Demokratike dhe kryetari i saj ne mendojmë që është zgjidhja për të bërë të mundur të paktën përballimin e jetesës në kushte minimale dhe të mbijetesës në fakt të shumicës së qytetarëve në qarkun e Korçës”, u shpreh ai.
Ai foli ndër të tjera, edhe për ngritjen e Komisionit Hetimor për zgjedhjet e 25 prillit, ku tha se qeveria i vodhi votat duke kryer një masakër elektorale.
