Është shtyrë me një javë nisja e vitit të ri akademik. Lajmin e ka bërë të ditur ministrja e Arsimit, Evis Kushi përmes një postimi në Facebook, ku shkruan se viti akademik 2021-2022 nis më 18 tetor.
Mësimi pas universitar ishte planifikuar të niste më 11 tetor, por ministrja njofton se është shtyrë për shkak se java që vjen do të cilësohet si “Java e vaksinimit masiv të studentëve”.
“Meqenëse fillimi i vitit të ri akademik po afron dhe ne duam që të gjithë ju, pa përjashtim, të hyni në auditore pa rrezikuar shëndetin tuaj dhe të stafeve akademike, javën e ardhshme e kemi shpallur si “Java e vaksinimit masiv të studentëve”. Shumë faleminderit edhe një herë Ministrisë së Shëndetësisë dhe Mbrojtjes Sociale që shprehu menjëherë gatishmërinë që në të gjitha fakultetet dhe universitetet e vendit të vendosë në dispozicion ekipet e tyre të vaksinimit, për të mundësuar mbarëvajtjen e këtij procesi“, shkruan ministrja.
Kushi kërkoi më shumë bashkëpunim nga strukturat e shëndetësisë, ndërsa studentëve iu bëri thirrje për të disatën herë të vaksinohen.
“E që kjo javë të jetë sa më produktive, me kërkesë të Konferencës së Rektorëve, viti i ri akademik do të fillojë zyrtarisht në datën 18 tetor, me qëllim që nga data 11-17 tetor të gjithë së bashku të jemi të fokusuar vetëm në procesin e vaksinimit të studentëve. Nga universitetet do të kërkoja sa më shumë bashkëpunim dhe koordinim me strukturat e shëndetësisë, për të venë në dispozicion të gjitha hapësirat e nevojshme për studentët dhe personelin e vaksinimit, ndërsa studentëve do t’u lutesha me gjithë zemër e do t’i inkurajoja fort që ta shfrytëzojnë edhe këtë mundësi të re, me qëllim që viti i ri akademik të jetë sa më i mbarë e i suksesshëm”, shtoi ministrja.
Stafi akademik dhe studentët futën tek ato kategori që do të vaksinohen me detyrim, pasi në të kundërt nuk do mund të ndjekin mësimin në shkolla.
