Qeveria vazhdon të mbështesë dhe t’iu japë hapësire atyre kompanive që po kthejnë kryeqytetin në një gangrenë betoni e gardaçelash. Skandali më i fundit është se ditën e sotme, Këshilli i Ministrave ka vendosur t’i jap kompanisë, “MEDITERRANEAN INVESTMENT GROUP”, SH.P.K statusin special.
Duhet të theksojmë se, me këtë status kësaj kompanie i krijohen benefite dhe hapësira për të ndërtuar edhe në bregdet.
“Në mbështetje të nenit 100 të Kushtetutës dhe të nenit 33/1, të ligjit nr.93/2015, “Për turizmin”, të ndryshuar, me propozimin e ministrit të Turizmit dhe Mjedisit, Këshilli i Ministrave Vendosi: Dhënien e statusit të veçantë “Investitor në strukturë akomoduese me 5 yje, status special” aplikuesit “Mediterranean Investment Group”, sh.p.k”, thuhet në vendim.
Problemi më i madh qëndron jo pse një kompani mori këtë status, por kjo nuk është një kompani e thjeshtë, është autori i përbindëshit “Eyes Tirana”, që po ndërtohet tek rruga e “Kavajës”. Si mund to jepet ky status një kompanie që po betonizon qytetin dhe shkatërron mjedisin?! Jo vetëm kaq, kjo kompani ka mashtruar me projektin e saj sepse, kur kanë nisur gërmimet e para informacionet për qytetarët dhe harta e projektit të publikuar fillimisht tregonte se, në këtë zonë do të krijohej më shumë hapësira të gjelbërta, pro që ndodhi krejt e kundërta.
Prej më shumë se dy vitesh aty vazhdojnë punimet dhe ndërtesa gjigante rritet edhe më shumë.
