Në muajin tetor Shqipëria arriti të blejë energji me çmimin më të lartë historik 260 euro për 1MWH, 5-fish më i lartë se e njëjta periudhë vitin e kaluar. Për shkak të thatësirës së tejzgjatur OSHEE ka ende nevojë të blejë energji në tregun e lirë për të furnizuar konsumatorët shqiptarë.
Në 7 tetor kompania pritet të dalë sërish në ankand dhe çmimet me të cilat do të përballet janë marramendëse. Të dhënat e bursave rajonale dhe ajo e Hungarisë, Hupex, nga e cila vendi ynë merr çmimet referuese variojnë nga 270 euro – 320 euro 1 MWH. Në ditët në vijim nuk përjashtohet mundësia që deri të premten çmimi të shkojë deri në 350 euro 1 MWH.
Sipas kësaj trajektoreje, OSHEE pritet të vendosë një çmim të ri historik për blerjen e energjisë, me institucionin që ende pa u mbyllur muaji ka harxhuar rreth 23 milionë euro më shumë për blerjen e energjisë se vitin e kaluar.
Nëse situata vazhdon e tillë, OSHEE do detyrohet të detyrohet që të rrisë çmimin e energjisë në vend për të përballuar çmimet, që pritet të kthehet në një barë tjetër për xhepat e qytetarëve shqiptarë.
