Pas një sezoni shumë të ngarkuar dhe me përplasje të fuqishme midis Lewis Hamilton dhe Max Verstappen, të cilët kërcënuan jetët e njëri-tjetrit në pistë, kampioni 7 herë i Formula 1 i ka dërguar një mesazh rivalit të tij.
Britaniku ka theksuar se Verstappen nuk është i pari që e ka vënë në shenjëstër dhe se është mësuar me sulme, pasi sipas tij gjithmonë ka qenë më i miri.
“Max nuk është piloti i parë me të cilin përballem për titull gjatë një botërori. Gjithnjë të tjerët më kanë vënë në shenjëstër, që kur kam qenë i ri. E kam pasur numrin 1 të stampuar në makinë time edhe para se të mbërrija në Formula 1.”-tha piloti i Mercedes.
Më tej ai ka shtuar si një formë ‘kërcënimi’ se ka raste kur pilotët gabojnë, por ka theksuar më tej se e rëndësishme është të mos ketë jetë të rrezikuara.
“I kam kaluar edhe më parë të tilla situata në Formula 1, që nga Fernando Alonso, Sebastian Vettel, Nico Rosberg e të tjerë. Ka pilotë që në një moment të konkurrimit gabojnë, ka nga ata që e kontrollojnë veten. E rëndësishme është që ky konkurrim të bëhet në siguri, pa vënë në rrezik jetën.”-deklaroi Lewis Hamilton.
Rikujtojmë se dhe pak gara kanë mbetur nga shpallja e fituesit të këtij kampionati dhe Hamilton është shumë afër titullit të tij të tetë./K.T/Gijotina.com
