Një çift bashkëshortësh që kishin planifikuar të udhëtonin jashtë vendit kanë rënë në prangat e policisë së Sarandës. Në kuadër të operacionit të koduar “Likojani” janë vënë në pranga personat Lutfi Faslliu 38 vjeç, i dënuar më parë për veprën penale “Trafikimi i mjeteve motorike” dhe Shano Faslliu 31 vjeçe (bashkëshortë me njëri-tjetrin), të dy banues në Konispol, Sarandë.
Policia jep detaje se çifti i bashkëshortëve as ushtronin aktivitetin kriminal të trafikimit të lëndës narkotike kanabis, të cilën synonin ta trafikonin jashtë vendit, si dhe aktivitetin e paligjshëm të dhënies ndihmë shtetasve të huaj për kalim të paligjshëm të kufijve, forcat e Policisë organizuan veprimet dhe bënë të mundur ndalimin e automjetit me drejtuese Shano Faslliu, e cila në bashkëpunim me burrin e saj po transportonte 2 emigrantë të paligjshëm, kundrejt shpërblimit monetar, drejt qytetit të Sarandës, me qëllim tranzitimin e tyre në territorin shqiptar, me destinacion vendet e BE-së.
Në vijim të veprimeve, gjatë kontrollit të ushtruar në banesën e tyre, Policia gjeti dhe sekuestroi një sasi prej 35.6 kg lëndë e dyshuar narkotike kanabis, 1 armë zjarri automatik dhe një sasi municioni luftarak.
Pritet që të arrestuarit në fjalë të përballen me akuzën për veprën penale “Trafikimi i lëndëve narkotike”, kryer në bashkëpunim, mbetur në tentativë, “Ndihmë për kalim të paligjshëm të kufirit” dhe “Prodhimi dhe mbajtja pa leje e armëve luftarake dhe e municionit”.
