Ylli i kombëtares së Italisë, Federiko Kieza autori i asistit në golin e vetëm të axurrëve ka patur rezervat e tij në lidhje me gjykimin e ndeshjes. Ai ka theksuar se Bonuçi nuk e meritonte kartonin e kuq teksa nuk hezitoi të komplimentonte kundërshtarin.
“Ishte normale që edhe ne të humbnim pas shumë ndeshjeve pozitive, por gjithsesi rekordi botëror na përket ende neve, ndonëse në duelin kundër Spanjës bëmë shumë gabime ne. Padyshim përgëzime spanjollëve, të cilët bënë një ndeshje shumë të madhe, por nëse ne do të kishim qenë më cinikë dhe të vendosnim që të vraponim më shpejt që në fillim, ndoshta do të kishte qenë diçka ndryshe.
Sa herë që zbres në fushë dua të vrapoj derisa mushkëritë dhe muskujt të ma lejojnë, jo vetëm për Juven, tifozët bardhezi dhe Alegrin, por edhe për Italinë, italianët dhe trajnerin Mançini.
Çfarë nuk shkoi? Pikësëpari ne, pasi thashë që nuk ishim shumë të qartë në lojë, por edhe arbitri ndikoi shumë. Nuk mund të japësh një të verdhë të parë për protesta dhe menjëherë në faullin e parë të Bonuçit t’i tregosh të verdhën e dytë. Kjo ishte shumë e ashpër. Absurde të shpërndash kartonë me kaq lehtësi”, tha sulmuesi.
