KPK ka konfirmuar sot në detyre prokurorin Albert Kuliçi. Prokurori doli sot përball komisionit të vettingut dhe në përfundim u vlerësuar pozitiv në lidhje me pasurinë, gjithashtu nuk iu gjet asnjë problem për figurën dhe për profesionalizmin.
Atij iu kërkuan shpjegime për mosdeklarim të pjesës takuese në dy shtëpi të lëna trashëgimi nga babai në deklarimet vjetore dhe të dhëna mbi pronarët e shtëpisë, që ai kishte në përdorim në Vlorë.
Kuliçi shpjegoi se pasuritë e babait, një shtëpi e pabanuar prej vitesh në Tropojë dhe një shtëpi në një fshat të Durrësit, nuk kishin qenë në “qarkullim të ligjshëm” dhe për këtë arsye ai nuk kishte deklaruar pjesë takuese në të, që sipas KPK ishte 1/5.
Nga arsyetimi i tij dhe hetimet e kryera nga komisioni u konstatuar se pasuritë e lartë përmendura ishin të justifikueshme dhe nuk përbëjnë shkas për shkarkim. Prandaj trupa gjykuese vendosi ta konfirmojë atë në detyrë.
Prokurori Albert Kuliçi ka filluar punë në vitin 2010 dhe punon prej vitesh në prokurorinë e Vlorës. Në dhjetor 2019, makina që ai përdorte u hodh në erë me eksploziv. Atentati u konsiderua nga Këshilli i Lartë i Prokurorisë si sulm për shkak të funksionit.
