Trajneri i skuadrës së Francës, Didier Deshamp ka theksuar se “gjelat” e meritonin fitoren dhe se kaluan pritshmëritë pasi të gjithë mendonin se në finale do të kalonte Blegjika.
“Në pjesën e dytë ndryshoi gjithçka, me krenari dhe personalitet, duke hedhur në fushë më shumë agresivitet. Pjesa e dytë ishte e gjitha e jona. Kjo është prova që Franca është konkurruese, por jemi pak me vonesë, pasi kemi ndryshuar edhe sistemin e lojës dhe na duhet kohë që nuk e kemi. Hodha në fushë edhe një të ri si Teo i cili shënoi golin vendimtar në ndeshjen e dytë.
Tani në ekip ka shumë konkurrencë. Për Teon kishte kohë që po mendoja, në fakt e kam grumbulluar edhe më parë. Ai mundet të luajë me 4 në prapavijë, e bën te Milani, është interesant në fazën ofensive, por duhet të përmirësohet në atë mbrojtëse. Ndërsa Kilian ishte i pafat në Europian, të shënonte këtë penallti ishte një sinjal i favorshëm për Francën.
A do preferoja një finale ndaj Italisë? Nuk është se do ta preferoja. Të gjithë imagjinonin një finale Itali-Belgjikë meqë belgët janë në vendin e parë të renditjes botërore prej vitesh dhe ne vinim nga dy barazime radhazi. Por në fund do të jetë Francë-Spanjë. Kjo e fundit dje tregoi forcë. Bëri të vuajë Italinë e cila nuk u dorëzua. Njoh mirë Spanjën, kur kanë topin është e vështirë”, tha Deshamp.
