Kryeministri Edi Rama ka vendosur që t’u përgjigjet pyetjeve të disa qytetarëve shqiptarë lidhur me krizën energjitike që paralajmëroi se do të prekë vendin që në gjashtë mujorin e parë të 2022.
Përmes një videoje të postuar në Facebook, kryeministri ka përzgjedhur disa pyetje, të cilave u ka dhënë edhe përgjigje.
E para ishte e një qytetari me emrin Petrit Gazulli, i cili pyet se përse Shqipëria varet nga tregu ndërkombëtar kur në fakt energjinë elektrike e prodhon në vend dhe nuk e blen në bursë.
Sipas kryeministrit Rama, Shqipëria prodhon energji kur ka reshje dhe blen kur ka thatësirë, për këtë arsye është e varur nga tregu ndërkombëtar për çmimin.
Pjesë nga videoja:
Edi Rama: Përshëndetje, e kam ndjekur me shumë vëmendje gjithë reagimin lidhur me krizën energjitike dhe raportin e komenteve tuaja këtu në këtë faqe mbi këtë krizë. Me një numër komentesh përfaqësues do të mundohem të bëj disa sqarime shumë të thjeshta.
Pyetja e parë:
Petrit Gazulli: Ne e prodhojmë në vend energjinë elektrike dhe nuk e blejmë në bursë, kështu që edhe çmimin mund ta vendosni vetë?!
Edi Rama: Jo i dashur Petrit, ne prodhojmë kur kemi reshje të mjaftueshme për mbushjen e hidrocentraleve dhe blejmë kur kemi thatësirë. Shqipëria është e varur nga tregu ndërkombëtar njësoj si vendet e tjera.
Ndërkaq pyetjes se pse duhet që kostoja e vendeve të zhvilluara si Spanja dhe Gjermania duhet të krahasohen me rrogat në vendin tonë, Rama tha se çmimet e bursës për energjinë në tregun ndërkombëtar janë të njëjta.
“Çmimet e bursës së energjisë në tregun ndërkombëtarë ku Shqipëria blen energji Shqipëria nuk bën ndonjë dallim me vendet e tjera në raport me rrogën”, ka theksuar Rama.
Kryeministri e nisi me një sqarim se pse po rriten çmimet, ndërsa në fund të videos tregoi se dhe rroga minimale pritet të shkojë deri në 38 000 mijë lekë të reja, ndonëse qeveria synon të shkojë 40 000 mijë.
