Ndërkombëtarët nuk aprovojnë fillimin e procesit të vettingut për Kosovë dhe Maqedoninë pavarësisht kërkesës nga të dy vendet, duke lënë të kuptohet se tek ne ky eksperiment nuk eci në rrugën e duhur.
Në fillim të konferencës ‘Tirana Connectivity Forum’ të zhvilluar në Tiranë sot, përfaqësuesja nga Kosova, Albulena Haxhiu , tha se qeveria e Vetëvendosjes ka vendosur ta aplikojë vettingun për të përjashtuar gjykatësit dhe prokurorët e korruptuar nga sistemi, por sipas saj, zyrtarët e Bashkimit Europian janë shprehur kundër këtij hapi, duke zbuluar kështu se edhe vetë në BE janë të ndërgjegjshëm se reforma tek ne ishte një eksperiment i pamenduar mirë.
“Kosovës nuk i është kërkuar të bëjë vetting në sistemin e drejtësisë. BE kërkon nga ne, që të fokusohemi në përmirësimin e mekanizmave disiplinorë që janë në sistem, por këto nuk kanë funksionuar;
Në fillim të mandatit tim jam takuar me përfaqësues të Bashkimit Europian. Kanë shprehur rezerva pikërisht për faktin se mund të mbesin institucionet pa personel, mund të kemi vakanca, apo të kemi institucione jofunksionale, siç ka ndodhur edhe rasti i Shqipërisë”, tha Haxhiu.
Të njëjtën gjë shprehu edhe Bojan Marickij, Ministri i Drejtësisë së Maqedonisë së Veriut, i cili tha se vetitngu ishte refuzuar nga ndërkombëtarët.
“Në strategjinë tonë të vitit 2017 ne parashikuam të aplikonim vettingun në vendin tonë. Fatkeqësisht, Bashkimi Europian nuk e mbështeti qëllimin tonë për vettingun, por ata mbështetën përforcimin e kritereve për zgjedhjen dhe përjashtimin e gjyqtarëve dhe të prokurorëve të rinj. Prandaj nuk e aplikuam vettingun, megjithëse ne donim ta bënim. Por ne implementuam filtrimin, që është një version më i lehtë i vettingut dhe që nuk shkakton ato pasoja që ka shkaktuar në vende të tjera”, tha ai.
Të dy ministrat e vendeve fqinje treguan në këto deklarata se, përfaqësuesit nga BE e kanë kuptuar gabimin që bënë në Shqipëri duke imponuar një reformë të sistemit, që në vend ta përmirësonte, e paralizoi atë. Pasi, sikur tregojnë edhe faktet vettingu në vendin tonë është shumë prapa me hapa, por edhe ka sa ka ecur ka krijuar kaos nëpër gjykata dhe prokurori, pasi institucionet e drejtësisë po vuaj mungesë stafi, për shkak të atyre që janë shkarkuar nga KPK.
Dhe pavarësisht thirrjeve të shumta nuk ka shumë interes nga gjyqtarë të rinj për të plotësuar vendet vakante.
