Ish-zëvendësministër i Financave, Elton Haxhi, deklaroi sot se në kushtet jemi nuk ka pse të rritet çmimi i energjisë elektrike. Sipas tij, kjo mund të ndodh vetëm në momentin që operatorët nuk sigurojnë dot të ardhurat.
Ai shprehet se, situata duket emergjente për shkak të gjendjes së rënduar financiare të operatorëve energjetikë, konkretisht OSHEE-ja, por gjithsesi barra nuk duhet t’i kalojë konsumatorëve.
“Shpallja e gjendjes së emergjencës energjetike mund të jetë e justifikuar në kushtet kur operatorët e tregut energjetik nuk kanë mundësi për të siguruar burimet e nevojshme për t’u hedhur në rrjetin energjetik.
Aty qartazi është përmendur, që operatorët të shkurtojnë investimet e panevojshme dhe të përqendrohen në sigurimin e burimeve financiare. Duket sikur situata është në emergjencë për shkak të gjendjes së rënduar financiare të operatorëve, më konkretisht OSHEE”, tha ai.
Bazuar në bilancet e gjashtëmujorit të fundit, Haxhi thotë se Shqipëria ka patur më shumë eksport se import dhe në këto kushte rritjen e çmimit të energjisë elektrike e cilëson të tepruar.
