Policia e Durrësit ka arrestuar një 26-vjeçar, pasi akuzohet se shantazhonte dhe kanoste një vajzë duke i marrë vlera monetare.
Sipas uniformave blu është prangosur M. K., 26 vjeç, banues në Durrës. Në mënyrë të përsëritur 26-vjeçari ka shantazhuar dhe kanosur një vajzë, duke i kërkuar shuma të ndryshme të vlerave monetare ose në të kundërt do publikonte në rrjete sociale disa foto intime.
Gjatë kapjes dhe ndalimit nga forcat e Policisë, ai po tërhiqte një sasi vlere monetare në një pikë të transferimit të parave, të cilat u sekuestruan në cilësinë e provës materiale.
26-vjeçari ishte në kërkim pasi Gjykata e Rrethit Gjyqësor Durrës ka caktuar masën e sigurisë “Arrest me burg” për veprën penale “Shtrëngimi me anë të kanosjes apo dhunës për dhënie pasurie”. Materialet i kaluan Prokurorisë së Rrethit Gjyqësor Durrës, për veprime të mëtejshme.
