Sekretari i Përgjithshëm i LSI, Endrit Braimllari denoncon se kriza energjetike vjen si pasojë e shpërdorimit të para publike dhe një kolapsi financiar të KESH dhe OSHEE.
Në një deklaratë për mediet, Braimllari shprehet se qytetarët detyrohen të paguajnë energjinë elektrike me çmim më të lartë, për shkak të keqmenaxhmit të KESH dhe OSHEE.
“Kriza e energjisë e paralajmëruar nga kryeministri vjen e gjitha si pasojë e keqmenaxhimit dhe shpërdorimit të parave publike në këtë sektor. Kemi të bëjmë me një kolaps financiar të KESH dhe OSHEE. Qytetarët do të detyrohen të paguajnë energjinë elektrike me çmim më të lartë, për shkak të hajdutërisë së qeverisë dhe marrëdhënies së saj të ngushtë me oligarkët. Për shkak të keqmenaxhmit të KESH dhe OSHEE. Çmimi i energjisë elektrike do të rritet nga Rilindja për t’u mos u ulur më”, tha Braimllari.
Sipas tij, kjo situatë duhet të menaxhohet nga fondet e KESH dhe OSHEE pasi kur para disa vitesh u rrit çmimi i energjisë, u bë me qëllim për të përballuar kriza të tilla.
“Një situate e tillë, duhet të menaxhohet e gjitha nga fondet e KESH, OSHEE, sepse para disa vitesh u rrit çmimi i energjisë pikërisht për këtë arsye që të investohej në sektor për të përballuar kriza të tilla. Një qeveri e përgjegjshme mbi bazat e konsumit që ka vendi përgjatë një viti duhet të kishte parashikuar qartë dhe të kishte marrë masa për të mos rënduar qytetarët”, shprehet Braimllari.
Ndër të tjera, ai ngre pyetjen se përse nuk përballohet kriza nga KESH e OSHEE dhe kaska e Drinit është në nivele kritike. Sipas tij, KESH shet më lirë energji dhe nuk e çon këtë për nevojat e tregut të brendshëm, ndërsa OSHEE importon energji.
Nisur nga kjo, ai i bën thirrje SPAK të hetojë dy kompanitë me qëllim të kuptohet që nuk ka të bëjë me një krizë, por më një kolaps financiar të këtyre institucioneve.
