Kreu i Partisë Demokratike Lulzim Basha ka në selinë blu ambasadorin holandez në Shqipëri, Reinout Vos. Me anë të një postimi në Twitter, Basha shkruan se bisedoi me të për sfidat e Shqipërisë në procesin e integrimit si dhe për procesin e zgjedhjeve të 25 prillit.
Basha ka ndarë me ambasadorin shqetësimin për shkeljen e çdo standardi në zgjedhje, ndërkohë që ka shtuar se janë të angazhuar për të bashkëpunuar në realizimin e standarteve për përmirësimin e jetës së qytetarëve.
“Mirëprita ambasadorin hollandez Reinout Vos. Diskutuam mbi sfidat e Shqipërisë në procesin e integrimit. Ndava shqetësimin për shkeljen e çdo standardi për zgjedhjet në Shqipëri siç dëshmon dhe raporti i ODHIR, për korrupsionin, lidhjet e politikës me krimin dhe trafiqet. Të angazhuar për të bashkëpunuar për realizimin e standardeve që përmirësojnë jetët e shqiptarëve”, shkruan Basha.
Reinout Vos ka ardhur si ambasador në vendin tonë më 26 gusht 2021.
