Policia e Shkodrës ka finalizuar operacionin e koduar “ÇIES”, për goditjen e veprimtarisë kriminale në fushën e kultivimit të bimëve narkotike. Si rezultat kanë rënë në pranga 2 persona, Nikolin Lami, 24 vjeç dhe Armando Nika, 20 vjeç, të dy banues në Shkodër.
Policia njofton se po punohet për kapjen e personave Gj. G., 39 vjeç dhe T.V., 38 vjeç, po ashtu banues në Shkodër.
Për personat në fjalë, Gjykata e Rrethit Gjyqësor Shkodër ka vendosur masën e sigurisë “arrest në burg”, për veprën penale “kultivim i bimëve narkotike, kryer në bashkëpunim”. Në kuadër të këtij hetimi janë gjetur, sekuestruar dhe asgjësuar bimë të dyshuara të llojit kanabis sattiva në faza të ndryshme të kultivimit.
Materialet proceduriale i kaluan Prokurorisë Pranë Gjykatës së Shkallës së Parë Shkodër për veprime të mëtejshme.
