Zbardhet konflikti i ndodhur një ditë më parë në Korçë, ku u përfshinë disa të rinj mes të cilëve edhe një punonjës policie. Nga veprimet hetimore të kryera i riu me iniciale A. K., gjatë një konflikti për motive të dobëta, ka dëmtuar me mjete të forta bashkëmoshatarin e tij me iniciale E. Sh., 23 vjeç, banues në Korçë, i cili u dërgua në Spitalin e Traumës Tiranë, ku ndodhet jashtë rrezikut për jetën. Ndërsa punonjësi i policisë, E. J., duke qenë jashtë shërbimit, është përfshirë në këtë konflikt ku ka nxjerrë armën e shërbimit, pa u prezantuar si punonjës policie dhe gjithashtu nuk ka kryer raportimin e ngjarjes.
Pritet që personi i identifikuar me iniciale A.K të përballet me akuzën për veprën penale “Plagosja e lehtë me dashje”. Ndërsa për veprën penale “Shpërdorimi i detyrës” do të përballet efektivi i policisë E. J., 21 vjeç, banues në Korçë me detyrë punonjës policie pranë Komisariatit Korçë.
Materialet në ngarkim të tyre i kaluan Prokurorisë së Rrethit Gjyqësor Korçë për veprime të mëtejshme.
