Policia e Kosovës ka arrestuar 5 persona, të cilët dyshohet se po përgatisnin sulme terroriste. Në lidhje me arrestimin e tyre ka pasur një hetim prej disa muajsh, teksa aksioni është zhvilluar nga Drejtoria Kundër Terrorizmit.
Në momentin e arrestimit të tyre, policia ka sekuestruar eksploziv, armë, dron si dhe një armë anti-tank.
Mbi personat e arrestuar rëndojnë veprat penale: “Përgatitja e veprave Terroriste ose veprave penale kundër rendit Kushtetues dhe Sigurisë së Republikës së Kosovës” , “Kryerja e veprës terroriste” , “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse” si dhe “Mbajtja në pronësi, kontroll ose posedim të paautorizuar të armëve”.
Gjithashtu, Prokuroria Speciale bën me dije se do bëhet dhe kërkesa për caktim të paraburgimit për të arrestuarit.
