Policia e Tiranës ka reaguar në lidhje me konfliktin e mëngjesit të sotëm të regjistruar pranë shkollës “Andon Zako Çajupi”. Sipas policisë bëhet me dije se janë konfliktuar 6 persona, teksa 5 prej tyre janë shoqëruar tashmë në komisariat. Bazuar në njoftim, ka disa të lënduar si pasojë e konfliktit, ndërsa një 32-vjeçar është dërguar për trajtim mjekësor në spital.
“Pas marrjes së njoftimit se në rrugën “Kongresi i Manastirit” ishin duke u konfliktuar dyshohet me sende të forta 6 persona, menjeherë në vendngjarje kanë shkuar shërbimet e Policisë Rrugore, të cilat ishin në patrullim dhe kanë ndërhyrë menjeherë. Më pas në ndihmë të tyre kanë ardhur shërbimet e Patrullës së Përgjithshme dhe Forcat “Shqiponjat” të cilët kanë bërë të mundur parandalimin e përshkallëzimit të mëtejshëm të konfliktit dhe shoqërimin e 5 shtetasve të dyshuar si pjesëmarrës në konflikt, për veprime të mëtejshme. Si pasojë e konfliktit janë dëmtuar lehtë disa shtetas, ku njëri prej tyre shtetasi E. K. 32 vjeç, ka shkuar në spital për ndihmë mjekësore, i dëmtuar me sende të forta”, bën me dije policia.
