Këtë të martë Kombëtarja shqiptare do të presë në ‘Air Albania’ Poloninë në ndeshjen më të rëndësishme të kualifikueseve të Botërorit ‘Qatar 2022’ që do të startojë në orën 20:45.
Në prag të kësaj sfide Policia e Shtetit ka publikuar edhe masat që do të merren, të cilat duket se do të jenë shumë të forta.
Disa nga rrugët kryesore të kryeqytetit do të bllokohen gjë që do të devijojë edhe trafikun, ndërsa tifozeritë do jenë gjithë kohës të kontrolluara dhe të survejuara nga policia.
Ndërsa është paralajmëruar se do të ketë ndërhyrje nga policia në ambientet e jashtme dhe ato të brendshme të stadiumit në rast trazirash.
“Policia ju bën me dije se në rastet e prishjes së rendit dhe qetësisë publike, do të ndërhyjë si në ambientet e jashtme të stadiumit, ashtu dhe në ambientet e brendshme, për rivendosjen e rendit dhe shoqërimin e personave që do shkaktojnë trazira apo kryejnë veprime antisportive. Policia e Tiranës edhe njëherë apelon për tifozeritë e dy skuadrave që të tregojnë qytetari dhe të zbatojnë rregullat dhe ligjin.”-shkruhet në njoftim.
Masat që do të merren nga policia:
Në këtë kuadër do të ketë bllokime të disa segmenteve rrugore, të cilat do të jenë të bllokuara, nga ora 16:00 deri në përfundim të aktivitetit janë:
– Rruga përreth stadiumit “Lek Dukagjini”, rruga “Faik Konica” rruga “Dervish Hima”, rruga “ Gjergj Filipi”, rruga Asim Zeneli” rruga “Papa Gjon Pali II”, nga kryqëzimi me rrugën “Ismail Qemali” deri tek stadiumi “Air Albania” dhe bulevardi “Dëshmorët e Kombit”, nga presidenca deri te sheshi “Nënë Tereza”.
Hyrja e tifozëve do të fillojë në orën 18:00, dhe lëvizja e tyre do të garantohet nga Policia, përgjatë rrugëkalimeve të caktuara dhe nuk do të lejojnë grumbullim apo kalim të tifozëve jashtë itinerarit të caktuar.
Po në zbatim të planit të masave, do të ushtrohen kontrolle ndaj tifozëve para hyrjes në stadium për sende të kundërligjshme (si armë, sende të forta, bidonë uji, çadra, çelësa metalik apo lëndë piroteknike etj.) dhe çdo tifoz duhet të jetë i pajisur me dokument identifikimi.
Nuk do të lejohen të futen në stadium persona pa dokument identifikimi, si dhe fëmijët nën moshën 16 vjeç, pa praninë e prindërit apo kujdestarit.
Policia ju bën me dije se në rastet e prishjes së rendit dhe qetësisë publike, do të ndërhyjë si në ambientet e jashtme të stadiumit, ashtu dhe në ambientet e brendshme, për rivendosjen e rendit dhe shoqërimin e personave që do shkaktojnë trazira apo kryejnë veprime antisportive. Policia e Tiranës edhe njëherë apelon për tifozeritë e dy skuadrave që të tregojnë qytetari dhe të zbatojnë rregullat dhe ligjin./K.T/Gijotina.com
