Ambasadorja Yuri Kim ka reaguar pak minuta më parë në rrjetin social “Twitter”, ku ka reaguar për patronazhistët e kërkon që autoritet të veprojnë sipas rekomandimeve të OSBE/ODIHR.
Kim shkruan: “Ne i nxisim autoritetet të veprojnë sipas rekomandimit te mëposhtëm dhe rekomandimeve të tjera të OSBE/ODHIR në lidhje me zgjedhjet e 25 prillit. E drejta e qytetarëve për të votuar lirshëm – pa frikë apo presion apo joshje të paligjshme – është themelore për demokracinë.”
Në lidhje me patronazhistët ka reaguar para disa muajsh dhe Lulzim Basha, i cili e ka quajtur një krim.
Aso kohe kryetari i opozitës shprehej: “Sistemi i patronazhistëve nuk është gjë tjetër veçse vjedhje e të gjitha të dhënave personale dhe private të qytetarëve shqiptarë, tuajat, të gazetarëve në veçanti madje, por të gjithë qytetarëve shqiptarë dhe të përdorimit të tyre nga sistemi i patronazhistëve që është një sistem kriminal i përbërë nga njerëz të cilët duhet tu vijë turp nga vetja, të cilët duhet të hetohen për veprimtari kriminale, për shantazhe, për përdorimin e këtyre të dhënave, për ngritjen pra de facto, të një tjetër sistemi të ngjashëm me atë të sigurimit të shtetit të para viteve ’90″
Për këtë temë, ka pasur dhe një reagim nga ana e OSBE, pak ditë pas zgjedhjeve, e cila ngrinte si shqetësim rrjedhjen e informacionit të votuesve dhe shitjen e votës. SHBA aso kohe u kërkoi organeve hetimore e gjyqësore që çdo individ që ka bërë shkelje, të mbajë përgjegjësi.
“Ne vërejmë se gjetjet e tyre tregojnë për një praktikë të përhapur të blerjes së votave që mbetet ende një problem dhe gjithashtu shprehim shqetësim në lidhje me rrjedhjen e të dhënave personale tejet sensitive, përfshirë edhe preferencat politike të qytetarëve. SHBA ngul këmbë që organet e hetimit dhe gjyqësori duhet të mbajnë përgjegjës çdo individ që ka shkelur ligjin apo që ka ndaluar vullnetin e qytetarëve të Shqipërisë për të votuar në zgjedhje të lira dhe të ndershme.”
