Ish-bomberi i ekipit kombëtar, Erjon Bogdani ka analizuar paraqitjet e Armando Brojës me kuqezinjtë. Ai ka theksuar se sulmuesi ka shumë potencial për të shfrytëzuar.
“Nuk diskutohet që shoh edhe veten time te Broja në disa gjëra. Dhe kjo për arsyen se ai është pavarësisht se një djalë i ri, e ka demonstruar edhe vjet me skuadrën e Viteshes se çfarë potenciali ka. Ndërkohë që edhe trajneri i Çelsit ka shprehur fjalë shumë të mira për Brojën.
Është një djalë në perspektivë, por një djalë që me të cilin duhet të jemi të kujdesshëm, sepse karriera e një futbollisti nuk varet as me një ndeshje, as me dy ndeshje. Unë mendoj se ai i ka të gjitha mundësitë për të qenë golashënues jo vetëm me ekipin kombëtar, por golashënues edhe me një ekip shumë të mirë, siç është edhe Çelsi.
Po flasim për një lojtar që ka shpejtësi dhe mënyrë ekzekutimi shumë të mirë. Është i fortë, sidomos me kokë, është i fortë edhe të mbrojë topin, por për mendimin tim nuk është si një pykë e parë statike, por është një pykë e parë siç e kërkon futbolli i kësaj kohe pra që është i lëvizshëm dhe nuk rri në qendër të sulmit, por është shumë i lëvizshëm. Edhe goli që realizoi të shtunën i kishte të gjitha: teknikë, shpejtësi dhe forcë. Ishte një veprim individual shumë i mirë”, tha Bogdani.
