Ngjitja e skuadrës së Dinamos në Superiore ka bërë të mundur që shumë gjëra të ndryshojnë. Drejtori Adrian Dedja ka theksuar se skuadra ka prioritet talentet e reja teksa ka shpjeguar me detaje këtë organizim.
“Me ardhjen e presidentit Adrian Bardhi në krye të Dinamos, ngritja e akademisë u caktua si një nga prioritetet e punës, sepse akademia për një klub të madh është A-ja.
Është një projekt i studiuar mirë. Janë ngritur të gjitha ekipet e sistemit të akademisë, që nga 7 vjeç e deri tek U-21.
Qëllimi kryesor i presidentit Bardhi është që të kthejmë identitetin e Dinamos, duke nxjerrë në një të ardhme të afërt lojtarët që do t’i shërbejnë asaj.
Për këtë kemi zgjedhur edhe një staf të kualifikuar, me disa ish-lojtarë të Dinamos që janë të lidhur me fanellën.
Po ju them një fakt: akademia jonë është ndër të vetmet në vend, në mos e vetmja, që monitoron të rinj të talentuar edhe në qytetet e tjera të Shqipërisë, jo vetëm në Tiranë. Madje, edhe në Kosovë. Këta lojtarë trajtohen me bonuse në akademinë e Dinamos, u krijohen kushte akomodimi dhe shkollimi, përveç stërvitjes. Kemi lojtarë aktualisht tek ekipet tona që janë nga Vlora, Orikumi, Fieri, Kavaja dhe Kosova. Është njësoj si funksiononte Dinamo edhe para viteve ’90, kur merrte lojtarë të spikatur nga të gjitha qytetet. Këtë po bën edhe tani, në 2021-shin. E riktheksoj, duam t’i kthejmë identitetin Dinamos, jo thjesht të kemi një akademi sepse duhet. Deri tani janë bërë hapa galopantë dhe jemi të kënaqur për këtë fakt. Mesazhi im është se të gjithë fëmijët e talentuar e kanë një derë të hapur te Dinamoja, një nga skuadrat më të mëdha në vend”, theksoi Adrian Dedja.
