Në këto ditë të para të javës së vaksinimit që ka nisur pranë godinave universitare, interesi i studentëve për të marrë dozën e parë të vaksinës paraqitet i ulët. Pas Tiranës, edhe Universiteti i Durrësit ka pasur numër të vogël studentësh që kanë shkuar për t’u vaksinuar.
Shumë studentë hezitojnë të vaksinohen edhe pse kjo mund t’i mbajë larg auditoreve. Ata shprehen të pakënaqur nga detyrimi për t’u vaksinuar.
Ministrja e shëndetësisë Ogerta Manastirliu, ka ndjekur nga afër procesin e vaksinimit në kampuset universitare dhe ka theksuar se vaksinimi është e vetmja mënyrë për të vijuar studimet në auditore. Ajo gjithashtu pasditen e sotme ka takuar kryetaren e Bashkisë së Durrësit dhe drejtuesit e njësive administrative të kësaj bashkie, e cila u ka kërkuar që të intensifikohet fushata “derë më derë” që qytetarët të sqarohen dhe të binden për t’u vaksinuar.
Procesi i vaksinimit vazhdon edhe në Universitetin e Gjirokastrës, ndonëse edhe aty interesimi është ende i ulët.
