Në raportin vjetor të koncesioneve, Ministria e Financave thotë se në 16 dhjetor të këtij viti përfundon afati i koncesionarit të inceneratorit për qarkun e Elbasanit. Në këtë kuadër, Autoriteti i Konkurrencës ka njoftuar bashkitë që preken nga ky projekt që të fillojnë të marrin masa për të marrë në dorë situatën.
Pra, vitin e ardhshëm bashkitë duhet të marrin vetë në dorëzim edhe pjesën e punës që kryhej nga ana e koncensionarit. “Kjo kontratë koncesionare përfundon në 16 Dhjetor 2021, si rezultat Autoriteti Kontraktues ka mobilizuar bashkitë subjekt të kontratës që të përfshihen në procesin e marrjes në dorëzim të të gjitha asketeve të krijuara në kuadër të këtij koncesioni si dhe të impiantit të prodhimit të energjisë elektrike”, thuhet në raport.
Por kjo mund të shkaktojë kosto më të lartë për qytetarët, pasi edhe nëse bashkitë zgjedhin që të paguajnë koncesionin për të vazhduar ai punën, do t’u duhen para shtesë për këtë fond, të cilat në të vërtetë nuk i kanë. Pra, ose do të heqin kostot për një zë tjetër ose duhet të shtojnë taksat për pastrimin, të cilat bien barrë mbi qytetarët.
Bashkitë janë të papërgatitura për të përballuar këto kosto, nga ana tjetër ministria thekson se kontrata me koncesionarin mund të zgjatet vetëm për arsye madhore, por edhe në këto raste për një kohë të caktuar. “Palët bien dakord se periudha e koncesionit zgjatet në rastet e forcës madhore për një periudhë kohe të barabartë sa ka zgjatur ngjarja, plus kohën e arsyeshme që duhet për riparimin e dëmeve me kushtet që vetë ngjarja madhore të ketë zgjatur një muaj”, thekson raporti.
Pra, siç tregojnë të dhënat edhe situata për menaxhimin e mbetjeve po del jashtë kontrollit dhe kjo vetëm për shkak të neglizhencës nga të gjitha palët.
E. H/ gijotina.com/
