Të shtënat me armë zjarri tronditën kryeqytetin në zonën e “Komunës së Parisit” dhe mbeti i plagosur 22-vjeçari Redi Balla. Sot është zbardhur dëshmia e të riut, i cili tha në dëshminë e tij se nuk e ka parë personin që e qëlloi.
Mësohet se Balla u tha hetuesve që e morën në pyetje se nuk kishte parë fytyrën e personit, apo personave (nuk e përjashton të ishin më shumë se një), që e qëlluan me armë zjarri. Ai pretendon se në momentin që e kanë qëlluar, ka qenë duke përdorur celularin brenda në makinë dhe nuk ishte i vëmendshëm.
“Parkova makinën dhe po merresha me celularin, nuk e pashë se kush më qëlloi”, mësohet të jetë shprehur 22-vjeçari.
Sapo dëgjoi të shtënat, ai thotë se mbuloi kokën me duar për t’u mbrojtur. Po ashtu, nuk ka dhënë asnjë detaj për arsyen se përse ishte ai shënjestër e një atentati.
Redi Balla i është nënshtruar një ndërhyrje kirurgjikale në Spitalin e Traumës dhe ndodhet jashtë rrezikut për jetën. Ndonëse është qëlluar nga afër plumbat e kanë marrë në këmbë.
Rezulton se Redi Balla është person problematik, i hetuar disa herë për përfshirje në konflikte, por deri më tani nuk rezulton që të jetë i dënuar për ndonjë vepër penale. Konfliktet e mëparshme janë pista kryesore ku edhe po hetohet, megjithatë nuk përjashtohen edhe pista të tjera.
Vendi ku ndodhi ngjarja hedh dyshime se autorët kishin kohë që e ndiqnin të riun, duke gjetur momentin për të qëlluar ndaj tij, pasi Balla nuk është banor i Komunës së Parisit, vend ku edhe u qëllua.
“Komuna e Parisit” është një zonë mjaft e frekuentuar dhe e rrethuar nga biznese me kamera të shumta sigurie, të cilat me shumë gjasë kanë ndjekur çdo lëvizje tyren e mund të shërbejnë për identifikimin e tyre.
