Epidemiologu, Erion Dasho, i ka bërë thirrje qeverisë që të mos i detyrojnë qytetarët dhe sidomos studentët të vaksinohen. Përmes një postimi në Facebook ai tregon se edhe Shqipëria duhet të procedoj si vendet e tjera të shesin teste në supermarket më një çmim të arsyeshëm.
Kështu, qytetarët që nuk duan të vaksinohen mund të bëjnë testin çdo javë.
“Nuk ka vetëm vaksina! Vaksina sigurisht është opsioni më i mirë dhe i preferuar për këdo që synon të mbrojë veten dhe të tjerët nga COVID, por asnjëherë nuk duhet harruar testimi! 4 teste x 80 cent të blera sot në supermarket në Gjermani tregojnë se si sillet një shoqëri e përgjegjshme ndaj shëndetit dhe jetës së qytetarëve të vet”, shkruan ai.
Ndërsa thekson më poshtë, që në asnjë mënyrë nuk duhet të vendoset çmim i kripur për testes, sepse qeveria duhet të mendojë opsionin ë të mirë për qytetarët e saj dhe jo t’i rrjep ata. “Jo çmimit spekulativ dhe rrjepës prej 3,000 apo 4,000 lek për një test të shpejtë! Respekt për zgjedhjen e lirë të studentëve, pedagogëve dhe të çdo profesionisti tjetër! Nëse dikush refuzon vaksinimin, atij/asaj duhet t’i njihet e drejta e testimit përkundrejt një çmimi të përballueshëm! Vaksinim Po! Detyrim Jo”, shprehet Dasho.
Kujtojmë se për pak ditë do të nisë viti i ri akademik dhe qeveria ka dhënë ultimatum që nuk do të futen në auditor studentët e pa vaksinuar. Nga ana tjetër raportohet një numër shumë i ulët i studentëve që kanë shfaqur interes për të marrë vaksinën.
