Deputeti i Partisë Demokratike Arbi Agalliu është shprehur sot se çdo ditë po vërtetohen denoncimet e PD lidhur me aferat korruptive të qeverisë. Përmes një postimi në Facebook ai shprehet se, në deklaratën e djeshme FMN nxori në pah skemat që përdor qeveria jonë për të vjedhur qytetarët.
“Tjetër goditje nga institucionet ndërkombëtare për Qeverinë dhe pikërisht nga FMN i cili thekson saktësisht se: Rritja e shpejtë e stokut të Partneriteteve Publike Private (PPP) që pritet të arrijë në 50% të PBB-së në 2021, nga 33% vitin 2018 kërkon dyfishimin e përpjekjeve për të forcuar menaxhimin e investimeve publike (MIP. Ka mungesë në transparence mbi tejkalimin e kostove dhe afateve fillestare dhe mosrespektimin e proceseve të miratuara të përzgjedhjes dhe miratimit të projekteve, përfshirë këtu kur PPP-të përdoren për të anashkaluar tavanet buxhetore afatmesme”, shkruan ai.
Më tej, Agalliu paralajmëroi se kjo çështje nuk do mbetet me kaq, pasi PD i ka paraqitur FMN shqetësimet dhe shkeljet e konstatuara, kështu monitorimi ndaj qeverisë do të vazhdojë. “Kjo tregon edhe njëherë atë që Partia Demokratike ka thënë dhe denoncuar prej kohësh, abuzimin dhe aferat korruptive që fshihen pas PPP-ve. Edhe gjatë takimit të zhvilluar pak ditë më parë me përfaqësues të FMN-së ndamë këto shqetësime të cilat mbajnë peng zhvillimin ekonomik të Shqipërisë”, tha ai.
Shpesh herë PD ka dalë në deklarata ku e akuzon qeverinë se lidh kontrata me kompani mike dhe oligrake, për vjedhur nga xhepat e qytetarëve. Ndërsa dje përmes një deklarate publike FMN evidentoi gjithashtu këto shkelje nga ana e qeverisë për kontratat PPP.
