Federata e Futbollit të Kosovës ka shkarkuar zvicerianin Bernard Challandes nga stoli i Kombëtares dardane. Ashtu siç pritej kontrata e cila duhej të mbaronte në dhjetor të 2022-shit është ndërprerë nga FFK-ja.
Shkak i një vendimi të tillë janë bërë rezultatet e dobëta në kualifikueset e Botërorit ‘Katar 2022’, ku e fundit ishte disfata e mbrëmjes së martë në sfidën kundër Gjeorgjisë që u mbyll me shifrat 1-2 në stadiumin ‘Fadil Vokrri’.
70-vjeçari ishte trajneri i dytë në historinë e ekipit kombëtar të Kosovës, pas Albert Bunjakit, që prej pranimit të Kosovës në UEFA dhe FIFA më 2016. Ai mori drejtimin e stolit të dardanëve në 2018-ën, por nuk përmbushi rezultatet e dëshiruara.
Kosova ka zhvilluar 40 ndeshje nën drejtimin e zvicerianit dhe ndër to ka marrë 18 fitore, 14 humbje dhe vetëm 8 barazime./K.T/Gijotina.com
