Afati i dhënë nga kryeministri Rama prej 100 ditësh për Policinë e Shtetit që në muajin korrik duket se do të çojë të tjerë drejtues policie drejt shkarkimit pas dorëheqjes së imponuar të kryepolicit Ardi Veliu. Kur kanë mbetur vetëm dy ditë nga përfundimi i këtij afati, ministri i Brendshëm, Bledi Çuçi deklaroi që është duke u përgatitur një raport për punën e policisë në 100 ditë.
“Drejtori i ri e ka filluar punën edhe me këtë analizë. Ai do të jetë në të gjithë Shqipërinë dhe pa diskutim ky raport do të shërbejë edhe si një dokument për vlerësimin e gjithsekujt për të vazhduar, është një punë e vazhdueshme dhe jo një veprim i shkëputur në mënyrë që të kemi një trupë profesionale që policia e shtetit të jetë në lartësinë e duhur. Edhe ministri do të jetë një raport përmbledhës për këtë gjë”, deklaroi ai.
Me këtë, ai la të nënkuptojë se shumë shpejt lëvizje të reja priten në Policinë e Shtetit, duke parë shifrat e situatës kriminale në vend, të cilat kanë ardhur në rritje dhe pa shumë punë parandaluese. Disa nga qytetet më problematike sa i përket kriminalitetit gjatë këtyre 100 ditëve mbeten Elbasani dhe Vlora, por nuk përjashtohen dhe qytetet e tjera.
Ndërkohë, një tjetër shqetësim për policinë mbetet dhe niveli i ulët i pagave përballë vështirësisë së funksionit që kryejnë. I pyetur për rritje të pagave për policët Çuçi tha se është në projekt diçka e tillë. “Jemi duke menduar edhe për këtë gjë. Ne kemi një projekt që do të krijojë mundësi për policinë për të marrë të ardhura nga shërbimet, për të shpërblyer vetë trupën e saj, po i shikojmë këto mekanizma pa e cenuar buxhetin e shtetit. Po i shkojmë këto mekanizma”, u shpreh kreu i dikasterit blu.
Megjithatë, vlen për tu përmendur se çdo ministër ka deklaruar në vite diçka të tillë, por që pagat e policisë mbeten më të ulëta krahasuar me rajonin, por dhe me punonjës të tjerë të administratës, të cilët e kanë nivelin e vështirësisë dhe rrezikshmërisë, shumë më të ulët se uniformat blu. Gijotina.com
