Deputeti dhe nënkryetari i grupit parlamentar të Partisë Demokratike, Ervin Salianji, në një intervistë për mediat ka folur për aksionin që do të ndjekin demokratët në Parlament. Deputeti demokrat ka hedhur poshtë një bashkëpunim me Partinë Socialiste, duke refuzuar çdo bashkëpunim me qeverinë dhe kryeministrin Rama.
“PD e ka kundërshtar dhe çdo lloj aludimi për bashkëpunim nuk ekziston. Ne jemi të vjedhur ndërkohë që ata janë hajdutët,” – shprehet Salianji.
Ai gjithashtu ka folur për propozimet që do të lehtësonin buxhetin e familjeve shqiptare, sa i përket rritjes së çmimit të naftës, gazit dhe energjisë elektrike.
“Fokusi kryesor i opozitës është që të bëjë gjithçka që mundet që të mos lejojë që këto të ndodhin” -thekson ai.
Salianji thekson se debatet e brendshme nuk do ta heqin fokusin nga aksioni opozitar, teksa PD ka ngritur edhe një mekanizëm të ri për çdo denoncim të qytetarëve.
Më tej ai është shprehur se protestat do të jenë një instrument që demokratët do ta përdorin, nëse qeveria nuk do të reflektojë përballë propozimeve të tyre për ulje të TVSH-së dhe çmimit për energjinë elektrike.
