Qeveria shqiptare nuk ka asnjë inventar për numrin e qytetarëve të cilat largohen nga vendi ynë, por në të njëjtën kohë nxjerr ligje për të lehtësuar punësimin e të ardhurve nga vendet e tjera. Ka qenë deputeti i Partisë Demokratike Ervin Salianji, ai i cili ka folur ditën e sotme në lidhje me këtë ligj, por gjithashtu edhe për situatën në vendin tonë, në lidhje me ngjarjet e fundit kriminale. Në një deklaratë nga Kuvendi i Shqipërisë, ka akuzuar qeverinë se po bën gjithçka për të krijuar pabarazi, e madje të gjitha pasuritë janë në duart e një grupi personash. Ndër të tjera Salianji ka reaguar edhe për ngjarjet e fundit kriminale, ku në kryeqytet janë shënuar dy plagosje vetëm në ditët e fundit. Policinë e ka cilësuar si një agjenci lajmesh, në një situatë ku ka ngjarje kriminale, djegie makinash, por autorët nuk kapen kurrë. Ndër të tjera ka prekur dhe temën e avionit në Vermosh, ku sipas tij, në vendin tonë vijnë avionë, por nuk gjenden se nga vijnë apo dhe personat që i përdorin.
Në gjendjen që është katandisur shteti ynë, nuk jemi në gjendje të kontrollojmë territorin me kaq banorë, ndërsa qeveria merr përsipër ardhjen e emigrantëve. Në përfundim, deputeti shprehet se sipas OKB, jemi vendi i parë për prodhimin e kanabisit.
