Kushtetuesja nuk mund të shqyrtojë zgjedhjet vendore të vitit 2019, sepse një gjë e tillë bëhet nga Kolegji Zgjedhor, deklaron Kristaq Kume, ish-kryetar i KQZ-së. Në një intervistë televizive Kume u shpreh se kryesisht institucionet i kanë respektuar këshillimet e bëra nga Komisioni i Venecias.
Sipas tij, janë struktura të tjera, dhe jo Gjykata Kushtetuese, që kanë detyrën për të vërtetuar ligjshmërinë e një procesi zgjedhor.
“Pra problemi është i zgjidhur…Për mua ata që e shkaktuan këtë gjë, ata që nuk morën pjesë në proces zgjedhor, humbën mundësinë që të ankoheshin në Kolegjin Zgjedhor. Opinioni këmbëngul, se me këtë legjislacion që keni, Gjykatës Kushtetuese ia keni hequr të drejtën të gjykojë ligjshmërinë e procesit, por ka kushtetueshmërinë e procesit….”.
Komisioni i Venecias, në një raport të dërguar palëve, la në fuqi zgjedhjet e 30 qershorit 2019 dhe nuk e këshilloi Gjykatën Kushtetuese që t’i përsërisë ato. Në raport thuhej ndër të tjera se bojkoti i PD-së në atë kohë nuk është arsye që zgjedhjet të mos mbahen çdo 4 vjet, siç Kushtetuta parashikon periodicitetin e tyre.
Ndërsa, duke kaluar tek zgjedhjet e ardhshme lokale dhe reforma territoriale, Kristaq Kume u shpreh se do të ishte një gabim i madh nëse harta do të ndryshohej në interes të dy forcave kryesore politike në vend.
